ორგანიზაცია „ახალგაზრდა ადვოკატები“ განცხადებას ავრცელებს და აღნიშნავს, რომ მზად არის განახორციელოს ადვოკატირება ყველა დამსაქმებლი ორგანიზაციის წინააღმდეგ, რომელიც თვითიზოლაციაში მყოფი დასაქმებულების მიმართ ახდენს ნებისმიერი სახის ზემოქმედებას და ქმნის ვითარებას, რომ დასაქმებულებმა დაარღვიონ თვითიზოლაციის წესები და გამოცხადნენ სამსახურში.
„ახალგაზრდა ადვოკატები“ მიმართავს ყველა დასაქმებულს, რომელიც უკანასკნელ პერიოდში აღმოჩნდა დამსაქმებლის მხრიდან ასეთი მოთხოვნის ქვეშ, მოახდინოს ორგანიზაციასთან კომუნიკაცია. საქართველოს შრომის კოდექსის 35-ე მუხლის თანახმად, დამსაქმებელი ვალდებულია უზრუნველყოს დასაქმებული სიცოცხლისა და ჯანმრთელობისათვის მაქსიმალურად უსაფრთხო სამუშაო გარემოთი. ორგანიზაცია მიმართავს დამსაქმებელ ორგანიზაციებს და შეახსენებს დასაქმებულთა უფლებებს, რომლის თანახმადაც, დასაქმებულს უფლება აქვს უარი განაცხადოს იმ სამუშაოს, დავალების ან მითითების შესრულებაზე, რომელიც ეწინააღმდეგება კანონს, ან შრომის უსაფრთხოების პირობების დაუცველობის გამო აშკარა და არსებით საფრთხეს უქმნის მის ან მესამე პირის სიცოცხლეს, ჯანმრთელობას, საკუთრებას ან ბუნებრივი გარემოს უსაფრთხოებას. დასაქმებული ვალდებულია დაუყოვნებლივ შეატყობინოს დამსაქმებელს იმ გარემოების შესახებ, რომლის გამოც იგი უარს ამბობს შრომითი ხელშეკრულებით ნაკისრი ვალდებულების შესრულებაზე.
„ახალგაზრდა ადვოკატები“ აღნიშნავს, რომ დასაქმებულების მხრიდან დამსაქმებელი ორგანიზაციების მიმართ, თვითიზოლაციის წესების დაცვაზე მითითებით, სამსახურში გამოცხადებაზე უარი არ შეიძლება გახდეს შრომით-სამართლებრივი ურთიერთობის შეწყვეტის საფუძველი. არც შრომის ანაზღაურებიდან დაქვითვის წინაპირობა. ორგანიზაცია მზად არის შეისწავლოს თითოეული ასეთი შემთხვევა და მისცეს მას სამართლებრივი მსვლელობა.
„ახალგაზრდა ადვოკატები“ მოუწოდებს დამსაქმებელ ორგანიზაციებს საქართველოში, მაღალი სამოქალაქო და პროფესიული პასუხისმგებლობით მოეკიდონ ქვეყანაში კორონავირუსის (COVID-19) გავრცელების პრევენციის მიზნით, მსოფლიო ჯანდაცვის ორგანიზაციისა და საქართველოს მთავრობის უწყებათაშორისი საკოორდინაციო საბჭოს რეკომენდაციებს, დაიცვან დასაქმებულთა უფლებები.
ცნობისთვის: დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, მათ აქვთ ინფორმაცია, რომ დამსაქმებლები აწუხებენ თვითიზოლაციაში მყოფ პირებს და ეუბნებიან, რომ სამსახურში გავიდნენ. „ჩვენ მოგვდის ინფორმაცია, რომ დამსაქმებლები აწუხებენ თვითიზოლაციაში მყოფ პირებს, რომ გამოდი სამსახურში. თავს ვიკავებთ პერსონალური ინფორმაციის გაცემისგან, მაგრამ ასეთ დამსაქმებლებს თუ გააგრძელებენ თვიიზოლაციაში ყოფი პირების იძულებას, მე დავასახელებ, “- განაცხადა პაატა იმნაძემ.
